Niuernermik Ilinniarfik (Greenland Business School) oplever stor søgning til deres etårige TNI-Flex-uddannelse
Nuummi Greenland Business Schoolimi ilinniartitaaneq TNI Flex ukioq manna qinnuteqartuni 109-iusuni 89-it piukkunnaateqarlutik akuerineqarmata aatsaat taama soqutigineqartigaaq. Siorna qinnuteqartut 42-upput.
Ilinniartitaaneq TNI Flex inuusuttunut, inuussutissarsiutinut ilinniartitaanermi aallartinnissamut naammassinnissimanngitsut, ilinniarfiuvoq. Ilinniagaq suliffinnik assigiinngitsuni misiliinernik akuleriiuvoq, taamaalilluni ilinniartut suliassanut piginnaaneri aammalu inuussutissarsiutinut ilinniarnerup naammassinissaanut imminut tatigineri qaffassarniarneqarput.
– Soqutiginnittoqarluarnera tulluusimaarutigisorujussuuarput. Ilinniartitaanermi pilersitatsinni inuusuttut ilinniarnerminnik unitsitsiinnartartut ajornartorsiutaanerannut annertusiartuinnartumut ikiorsiinissarput siunertaavoq. Qinnuteqartullu taama amerlatigimmata aaqqiissutissamik, inuusuttunut siunnerfigineqartunut tulluuttumik nassaarsimasugut erserpoq, Greenland Business Schoolip pisortaa Christel Lund Bøjler oqarpoq.
Ilinniartitaaneq TNI Flex 2016-imi aallartippoq. Ilinniarneq ukiumik ataatsimik sivisussuseqarpoq, nalinginnaasumillu ilinniartut naammassisartut amerlasuut ilinniartitaanermi ingerlaqqittarput.
Ajornartorsiut ajunngitsoq
Ilinniartitaanermulli soqutiginninneq annertooq Greenland Business Schoolimut ajornartorsiummik ajunngitsumik kinguneqarpoq. Ilinnialersussanit 89-iusunit 80-it Nuup avataaneersuupput, taamaattumillu inissamik pisariaqartitsillutik. Tamatuma saniatigut ilinniartitsisut tapersersortillu, soorlu isumaginninnermi siunnersortit, ilinniartut ilinniarnerminnik ingerlatsiinnarnissaannut ikiuuttussat amigaatigineqarput.
Greenland Business Schoolip aaqqissuussaanikkut unammilligassanut, ilinniarnissamut akuarineqarnissamut killiliisinnaasut qaangerniarnissaannut Ilinniartitaanermut, Kulturimut, Timersornermut Ilageeqarnermullu Naalakkersuisoqarfik suleqatigaa. Ilinnialersussanit inuusuttunit 89-iusunit sapinngisamik amerlanerpaat aallartinnissaat qulakkeerniarneqartussaavoq.
– Inuusuttut ilinnialernissamut kajumitsilernissaat ajornakusoortorujussuuvoq. Taakkunannga 89-it aallartinniarlutik aalajangersimammata itigartitsinermik naammattuuissagunik tujorminartorujussuussaaq, Christel Lund Bøjler oqarpoq.
